टी-२० विश्वकपको ट्रफी नेपालमा

काठमाडौँ – आइसीसी टी-२०  विश्वकपको ट्रफी नेपालमा सार्वजनिक गरिएको छ।

यो ट्रफी ३ दिनसम्म प्रदर्शनमा राखिने छ ।

ट्रफीलाई बसन्तपुर दरबार क्षेत्र, बौद्धनाथ स्तूपा परिसर र पोखरामा प्रदर्शनमा राखिनेछ ।

नेपालमा यसअघि सन् २०१८ मा अन्तर्राष्ट्रिय एकदिवसीय ओडीआई विश्वकपको ट्रफी ल्याएको थियो ।

ट्रफी सार्वजनिक समारोहमा राष्ट्रपति रामचन्द्र पौडेलले टी-२० विश्व कपको ट्रफी नेपाल आउनु देशका लागि गौरवपूर्ण क्षण भएको बताउनुभयो ।

यस ऐतिहासिक अवसरले नेपाल विश्व क्रिकेटको केन्द्रतर्फ अग्रसर भइरहेको सन्देश विश्वभर फैलाएको धारणा राष्ट्रपति पौडेलले व्यक्त गर्नुभयो ।

राष्ट्रपति भवन शीतल निवासमा सोमाबार आयोजित विश्व कप ट्रफी सार्वजनिकीकरण समारोहलाई सम्बोधन गर्दै उहाँले सो धारणा व्यक्त गर्नुभएको हो ।

“नेपाल आज खेलप्रेमी राष्ट्रको रूपमा सशक्त तवरले स्थापित हुँदै गएको छ, क्रिकेटले देशलाई एकतामा बाँध्ने महत्वपूर्ण भूमिका निर्वाह गरेको छ, यसको व्यावसायिक विकाससँगै खेल क्षेत्रमार्फत नेपाली युवाहरूको उज्ज्वल भविष्य निर्माण हुने आधारसमेत सुदृढ बन्दै गएको छ”, राष्ट्रपति पौडेलले भन्नुभयो ।

आवश्यक संरचना, अवसर र सम्भावनाहरू क्रमशः विकास हुँदै जानु नेपाली खेलकुद क्षेत्रका लागि सकारात्मक संकेत भएको उहाँको भनाइ थियो ।

नेपालमा विश्व कप ट्रफी ल्याई नेपाली क्रिकेट र जनताको उत्साह एवम् आत्मविश्वास अभिवृद्धि गरिदिनुभएकोमा अन्तर्राष्ट्रिय क्रिकेट परिषद्प्रति उहाँले धन्यवाद व्यक्त गर्नुभयो ।

“नेपालको क्रिकेटले अझ उचाइ हासिल गरोस, हाम्रा खेलाडीले विश्वमञ्चमा देशको गौरव अझ उच्च बनाउँदै लैजान सफल होउन् भन्ने शुभकामना व्यक्त गर्दछु”, राष्ट्रपति पौडेलले भन्नुभयो ।

राष्ट्रपति पौडेलले नेपालमा आयोजना हुन गइरहेको महिला विश्व कप छनोट प्रतियोगिता तथा भारत र श्रीलंकामा आयोजना हुन गइरहेको टी–२० विश्व कपमा सहभागी हुने हाम्रा महिला तथा पुरुष राष्ट्रिय क्रिकेट टोलीलाई उत्कृष्ट प्रदर्शनका लागि शुभकामना व्यक्त गर्नुभयो ।

टी–२० विश्वकप ७ फेब्रुअरीबाट भारत र श्रीलंकामा सुरु हुँदैछ ।

२० टोली सहभागी विश्वकप भारत र श्रीलंकाका ८ मैदानमा २९ दिनसम्म चल्नेछ।

नेपाल समूह ‘सी’मा परेको छ। नेपालको समूहमा इङ्ल्यान्ड र वेस्ट इन्डिजसँगै इटाली र बंगलादेश छन् ।।