अख्तियारको कामकारबाहीमा कुनै राजनीतिक हस्तक्षेप हुँदैन: सभापति लामिछाने

काठमाडौँ- राष्ट्रिय स्वतन्त्र पार्टीका सभापति रवि लामिछानेले अख्तियार दुरुपयोग अनुसन्धान आयोगमाथि कुनै किसिमको राजनीतिक हस्तक्षेप नहुने स्पष्ट पार्नुभएको छ ।

राज्य व्यवस्था तथा सुशासन समितिको आजको बैठकमा ‘अख्तियार दुरुपयोग अनुसन्धान आयोगको कामकारबाहीका सम्बन्धमा पदाधिकारीसँगको छलफल’मा उहाँले बिना पूर्वाग्रह काम गरेर इतिहास रच्न आयोगका पदाधिकारीलाई सुझाव दिनुभयो ।

सभापति लामिछानेले भ्रष्टाचारसम्बन्धी अनुसन्धान र अभियोजनलाई व्यवस्थित र वस्तुनिष्ठ बनाउन आग्रह गर्नुभयो ।

कुनै पनि राष्ट्रसेवक र जनप्रतिनिधिलाई अदालतको ढोकामा टेकाउने बित्तिकै उसको पद निलम्बन हुने र पछि सफाइ पाउने अवस्थाले व्यक्तिको व्यक्तिगत, पारिवारिक र व्यावसायिक जीवनमा गम्भीर क्षति पुगेको उहाँको भनाइ थियो । यसरी परेको क्षतिको परिपुरण कसरी गर्न सक्छौँ ? भनेर सभापति लामिछानेले प्रश्न गर्नुभयो।

उहाँले अनुसन्धान र अभियोजनमा मेहनत गर्न अख्तियारका पदाधिकारीहरुलाई आग्रह पनि गर्नुभयो ।।