पेरिस ओलम्पिक २०२४ को समापन समारोह आज

काठमाडौँ- पेरिस ओलम्पिक २०२४ आज सम्पन्न हुँदैछ ।

नेपाली समय अनुसार आज मध्यरातमा फ्रान्सको राजधानी पेरिसमा आयोजना हुने भव्य समापन समारोहबीच ओलम्पिक प्रतियोगिताको ३३औं संस्करण पेरिस ओलम्पिक २०२४ को विधिवत समापन गरिँदैछ ।

समापन समारोह आज राति पौने एक बजे शुरु हुने कार्यक्रम छ ।

पेरिसमा रहेको पुरानो रंगशाला स्टेडे दे फ्रान्समा ओलम्पिक समापन समारोहको आयोजना गरिदैँछ जहाँ ओलम्पिकमा सहभागी सबै खेलाडी र खेल पदाधिकारीहरुलाई विदाइ गर्ने कार्यक्रम छ ।

यसका साथै अबको ४ वर्ष पछि सन् २०२८ मा हुने ३४औं ओलम्पिक आयोजना गर्न अमेरिकाको लस एन्जल्स शहरलाई ओलम्पिम झण्डा हस्तान्तरण गर्ने कार्यक्रम पनि तय गरिएको छ ।

त्यसैगरी, अबको १७ दिन पछि यहि अगस्ट महिनाको २८ तारिखबाट हुने पेरिस २०२४ प्यारालम्पिक्सको झण्डा हस्तान्तरणको पनि कार्यक्रम छ ।

१६ दिनसम्म चलेको ओलम्पिक्सको अन्तिम दिन आज विभिन्न खेल विधामा १३ स्वर्ण पदकका लागि प्रतिस्पर्धा भएको छ । अब केही खेलमात्र बाँकी रहँदा हालसम्मको पदक तालिकामा चीनले सर्वाधिक ४० स्वर्ण पदक जितेको छ ।

चीनले २७ रजत र २४ कास्य पदक सहित कुल ९१ पदक जित्न सफल भएको छ ।

यसैगरी कुल पदक संख्यामा अघि रहेको अमेरिकाले ३९ स्वर्ण पदक सहित ४४ रजत र ४२ कास्य सहित १२५ वटा पदक जितेको छ । तेस्रो स्थानमा रहेको जापानले २० स्वर्ण पदक सहित ४५ पदक जितेको छ ।

९२ मुलुकले सहभागीता जनाएको पेरिस ओलम्पिक्समा ६२ मुलुकले स्वर्ण पदक जित्न सफल भएका छन् भने ८४ मुलकले कुनै एक पदक जितेका छन् ।

पेरिस ओलम्पकि-२०२४ यही साउन ११ गते भव्य समारोहकाबीच उद्घाटन गरिएको थियो ।।