रासायनिक मलको माग गर्दै धर्ना

पश्चिम नवलपरासी- विभिन्न दल सम्बद्ध सङ्घीय लोकतान्त्रिक मोर्चाले रासायनिक मलको उचित प्रबन्ध गर्न माग गर्दे आज जिल्ला प्रशासन कार्यालय नवलपरासीमा धर्ना दिएको छ ।

जिल्लामा मलको अभाव भएका कारण किसानहरू पीडित भएको भन्दै मोर्चाले मलखादको तत्कालै उचित व्यवस्थापनको माग गर्दे एक घण्टा जिल्ला प्रशासन कार्यालयको मूलगेटमा धर्ना दिएको हो ।

मोर्चाले प्रधानमन्त्री र लुम्बिनी प्रदेशका मुख्यमन्त्रीलाई ज्ञापन पत्र पठाउँदै मलको उचित व्यवस्थापन र नवलपरासीका लागि मलको कोटा वृद्धि गर्न माग गरेको लोकतान्त्रीक समाजवादी पार्टी लोसपा नेपालका अध्यक्ष मुकुरजी गिरीले जानकारी दिनुभयो ।

प्रदेश सरकारले नवलपरासीका लागि छुट्टाएको कोटा अत्यन्तै कम भएकाले पनि मल अभावको समस्या बढ्दै गएको मोर्चाको ठहर छ ।

मोर्चाले अहिले धानमा रासायनिक मल हाल्ने समय भएकाले तत्कालै मल आपुर्ति गर्न माग गरेको छ ।

सो क्रममा मोर्चामा आवद्ध दलका नेताहरूले जिल्लामा खाद्यान्न बाली मात्र नभई नगदे बालीका रुपमा उखु केराको समेत खेती हुने गरेकाले त्यसलाई पनि छुट्टै मलको कोटा निर्धारण गर्न माग गरेका छन् ।।