प्रधानमन्त्रीविरुद्ध अभिव्यक्ति दिने वैद्यले गर्नुभयो आत्मालोचना, भनाइ संसदको रेकर्डबाट हटाइयो

काठमाडौं– प्रधानमन्त्रीविरुद्ध प्रदेश सभा बैठकमा नै आपत्तिजनक अभिव्यक्ति दिनुभएका नेपाली कांग्रेसका प्रदेश सांसद नरोत्तम वैद्यले आत्मालोचना गर्नुभएको छ ।

प्रदेश सभाको शनिबारको बैठकमा विशेष समय लिएर वैद्यले आफ्नो अभिव्यक्तिको आत्मालोचना गर्दै माफी माग्नुभएको छ । उहाँले वाक स्वतन्त्रताको बढी नै उपभोग गरेको भन्दै आत्मालोचना गर्नुभएको हो । ‘म महात्मा गान्धी मान्ने मान्छे, वचनले पनि हिंसा हुनुहुँदैन भन्ने मान्छे, तर आवेसमा आएर यस्तो बोलेँ,’ उहाँले भन्नुभयो ।

वैद्यले आफ्नो भनाइ संसदको रेकर्डबाट हटाउन सभामुखको ध्यानाकर्षण गराउनुभएको थियो । उहाँले माफी मागेपछि सभामुख सानुकुमार श्रेष्ठले उहाँको भनाइ संसदको रेकर्डबाट हटाउन निर्देशन दिनुभयो ।