सन् २१०० सम्ममा गरिबी शून्यमा झार्ने सरकारको लक्ष्य : प्रधानमन्त्री

काठमाडौं– प्रधानमन्त्री शेरबहादुर देउवाले सन् २१०० सम्ममा गरिबी शून्यमा झार्ने सरकारको लक्ष्य रहेको बताउनु भएको छ ।

प्रधानमन्त्री देउवाले वि.सं. २०८७ सम्ममा गरिबीको रेखामुनि रहेका जनसङ्ख्या ५ प्रतिशतभन्दा तल झार्ने लक्ष्य रहेको पनि बताउनुभएको छ ।

३० औँ अन्तर्राष्ट्रिय गरिबी निवारण दिवसको अवसरमा आज शुभकामना मन्तव्य दिनुहुँदै प्रधानमन्त्री देउवाले सरकारले गरिबी निवारणसम्बन्धी विभिन्न कार्यक्रम कार्यान्वयन गरिरहेको बताउनु भएको छ । सरकारले गरिबी निवारणका लागि सहकारी क्षेत्रलाई एउटा प्रमुख माध्यम बनाई यसलाई उद्यमशीलता, उत्पादन र रोजगारीसँग आबद्ध गर्ने नीति लिएको उहाँले उल्लेख गर्नुभएको छ ।

विपन्न परिवारको संरक्षण गरी गरिबीको रेखाबाट बाहिर ल्याउने नीतिलाई सघनता साथ अघि बढाएको प्रधानमन्त्रीले संदेशमा उल्लेख गर्नु भएको छ ।गरिबी निवारणका लागि सरकारले मुक्त कमैया, हरुवा चरुवाको लागि विशेष कार्यक्रम सञ्चालन गर्ने नीति लिएको छ । हरेक वर्ष अक्टोबर १७ मा यो दिवस मनाउने गरिन्छ ।