खडेरीमा पानी माग्दै गाउँले

रुकुम पूर्व- रुकुम पूर्वमा अहिले पनि खडेरीमा पानी माग्ने चलन कायमै रहेको छ ।

मगर बस्तीमा परम्परादेखि खडेरीको बेला घर कुरिया उच्च हिमाली भेगमा लेकको पन्थ (पानीको मुहान) सम्म पुगेर नाचगान तथा होहल्ला गरेर फर्किने गर्छन् ।

यसरी होहल्ला गरिदिँदा भूमि देवता अशान्त भएर वर्षा गरिदिने जनविश्वास रहेको छ ।

जिल्लाको पुथा उत्तरगंगा १० तकसेरामा गोठालो समुहको निर्णयले बिहानै भूमि देवतासँग पानी माग्न बृद्धबृद्धा, युवायुवती र बालबालिका पानीको मुहान मुहानमा होहल्ला गरी पूजा गर्दछन् ।

पानी माग्ने दिन केही फोहोरी शब्द बोल्दा कसैले पनि रिसाउन नपाउने गोठाला समुहका अध्यक्ष बिष्णु बुढामगरले बताउनुभयो ।

यहाँका समुदायले अरु समयमा फोहोर वा जुठो हुन्छ भनेर सुङ्गुरको मासु लेकतिर लाने गर्दैनन् तर पानीको लागि करिब ३५ सय मिटर उचाइको उच्च भूभागमा पुगेर सुङ्गुरको थुमा पुजा गर्ने गर्छन् ।

लेकमा पुजा गरिसकेपछि केही तल झरेर पानीको अर्को मुहानमा आन्द्राभुँडी सफा गरेर मासु पोलेर सबैले बाँडेर खाने गरेको अध्यक्ष बुढाले जानकारी दिनुभयो ।।