मुस्लिम समुदायको बिदा कटौती नगर्न आयोगको माग, प्रधानमन्त्रीले भन्नुभयो– ‘चित्त दुखाउँदिन’

काठमाडौं– मुस्लिम आयोगले २०७८ सालमा नेपाल सरकारद्वारा दिइने सार्वजनिक बिदामा मुस्लिम समुदायका धार्मिक साँस्कृतिक चाडहरुलाई पनि समावेश गर्न माग गरेको छ ।

आयोगका अध्यक्ष समिम मियाँ अन्सारीले बुधबार प्रधानमन्त्री केपी शर्मा ओलीलाई भेटेर २०७८ सालका पर्वहरुमा बिदा कटौती गरिएकाले सच्याउन माग गर्नुभयो । जवाफमा प्रधानमन्त्रीले मुस्लिम समुदायको बिदा कटौती नहुने उल्लेख गर्दै आफूले चित्त नदुखाउने बताउनुभयो ।

विगतको स्थानीय चुनावमा मुस्लिम समुदायको पर्वका कारण मतदान नै सार्न आफूले पहल गरेको स्मरण गराउँदै प्रधानमन्त्रीले यसबारे छलफल गर्ने बताउनुभयो । आयोगले इद, बकर इद, मुहम्मद दिवस, मुहर्रम र शबे बारातमा नेपाल अधिराज्यभर बिदा दिन माग गरेको छ ।

सरकारले राजपत्रमा प्रकाशित गरेको आगामी वर्षको बिदामा मुस्लिम समुदायका चाडहरुमा स्थान विशेषलाई मात्रै पर्व बिदा दिने समावेश छ ।