परराष्ट्रमन्त्री खनालको तीन दिने भारत भ्रमण आजदेखि सुरु

काठमाडौँ- परराष्ट्रमन्त्री शिशिर खनाल आज भारत भ्रमणमा जानुभएको छ । भारतका विदेशमन्त्री डा एस जयशङ्करको मैत्रीपूर्ण निमन्त्रणामा भारतको तीनदिने औपचारिक भ्रमणकालागि त्यसतर्फ जानुभएको हो ।

भ्रमणका क्रममा परराष्ट्रमन्त्री खनालले उहाँका समकक्षी डा. जयशङ्करसँग औपचारिक भेटवार्ता गर्नुहुने परराष्ट्र मन्त्रालयले जनाएको छ ।

भेटमा उहाँहरूबीच द्विपक्षीय व्यापार, लगानी, सम्पर्क सञ्जाल (कनेक्टिभिटी), ऊर्जा तथा जनस्तरका सम्बन्धलगायत विषयमा छलफल हुनेछ ।

उच्चस्तरीय भ्रमणको नियमित आदानप्रदानको एक हिस्साका रूपमा यस भ्रमणले नेपाल र भारतबीच रहीआएको बहुआयामिक सम्बन्धलाई अझ सुदृढ तुल्याउने सहयोग गर्ने विश्वास लिइएको छ ।

परराष्ट्रमन्त्री खनाल यही जेठ २४ गते काठमाडौँ फर्कने कार्यक्रम रहेको पनि मन्त्रालयले जनाएको छ ।

यसैबीच, भारत भ्रमणमा रहनुभएका सत्तारूढ दल राष्ट्रिय स्वतन्त्र पार्टी (रास्वपा)का सभापति रवि लामिछाने भारत भ्रमण सम्पन्न गरी आज साँझ स्वदेश फर्किंदै हुनुहुन्छ ।।