बागमतीमा हेल्लो सीएम सेवा सुरु

मकवानपुर- बागमती प्रदेश सरकारले नागरिकका गुनासा प्रत्यक्ष रूपमा सुन्न, सुनुवाइ गर्न र समाधान प्रक्रियालाई प्रभावकारी बनाउन ‘हेल्लो सीएम’ गुनासो व्यवस्थापन सेवा सञ्चालनमा ल्याएको छ ।

मुख्यमन्त्री इन्द्रबहादुर बानियाँले बिहीबार मुख्यमन्त्री तथा मन्त्रिपरिषद्को कार्यालयमा आयोजित कार्यक्रममा उक्त सेवाको शुभारम्भ गर्नुभएको हो ।

सेवाका लागि मुख्यमन्त्री कार्यालयमै छुट्टै फाँट स्थापना गरिएको छ । नागरिकले टोल–फ्री नम्बर १६६०५७५२८९८, ह्वाट्सएप नम्बर ९८५५०८९४५६ तथा ocmcm@bagmati.gov.np इमेलमार्फत आफ्ना गुनासा दर्ता गर्न सक्ने व्यवस्था गरिएको छ ।

दर्ता भएका गुनासा तत्काल सम्बन्धित मन्त्रालय वा निकायमा पठाइने र समाधान प्रक्रियाको निरन्तर अनुगमन गरिने जनाइएको छ ।

प्रत्येक गुनासालाई छुट्टै आईडी प्रदान गरिने भएकाले सोही आईडीमार्फत गुनासोकर्ताले आफ्नो गुनासाको अवस्था, सुनुवाइ तथा समाधानको प्रगति अनलाइनमै हेर्न सक्नेछन् ।

सेवा सञ्चालनको पहिलो दिन नै हेटौँडा उपमहानगरपालिका हुँदै जिल्ला प्रशासन कार्यालय, जिल्ला अदालत, नापी कार्यालय तथा मुख्यमन्त्री कार्यालय जाने सडक लामो समयदेखि अलपत्र रहेको विषयमा गुनासो आएको थियो ।

टोल–फ्री नम्बरमा आएको गुनासो सुनेपछि मुख्यमन्त्री बानियाँले सम्बन्धित निकायलाई उक्त सडक निर्माणको काम तत्काल अघि बढाउन निर्देशन दिनुभयो ।

मुख्यमन्त्री बानियाँले सरकार नागरिकका गुनासा सुन्न मात्र नभई तिनको समाधान गर्न पनि प्रतिबद्ध रहेको बताउनुभयो ।

उहाँले प्रदेश सरकार जनताको विकास, समृद्धि र दैनिक समस्यासँग प्रत्यक्ष रूपमा जोडिएको संरचना भएकाले सरकारलाई जनताप्रति थप उत्तरदायी बनाउन ‘हेल्लो सीएम’ सेवा सञ्चालनमा ल्याइएको उल्लेख गर्नुभयो ।।