लुम्बिनी प्रदेश सरकारबाट बाहिरिदै कांग्रेस,मन्त्रीहरुले सामूहिक राजीनामा दिने

काठमाडौँ- केन्द्रमा सत्ता समीकरण परिवर्तन भएसँगै लुम्बिनी प्रदेश सरकारबाट नेपाली कांग्रेस बाहिरिने भएको छ ।
कांग्रेसबाट सरकारमा सहभागी पाँच मन्त्रीले भोलि सोमबार सामूहिक रूपमा राजीनामा बुझाउने तयारी गरेका छन् । सत्ता समीकरण फेरिएपछि सरकारमा बसिरहनु नैतिक रूपमा उचित नहुने निष्कर्षमा पुग्दै कांग्रेसले सरकारबाट बाहिरिने निर्णय गरेको हो ।

कांग्रेसबाट सरकारमा सहभागी खानेपानी तथा सहरी विकास मन्त्री सरोज थापा, आर्थिक मामिला मन्त्री धनेन्द्र कार्की, सामाजिक विकास मन्त्री जन्मजय तिम्सेना, पर्यटन मन्त्री प्रचण्डविक्रम न्यौपाने तथा वन तथा वातावरण मन्त्री देवकरण प्रसाद कलवारले सामूहिक रूपमा राजीनामा बुझाउने तयारी गरेका छन् ।

राजीनामा आजै बुझाउने तयारी भएपनि सार्वजनिक बिदा र मुख्यमन्त्री चेतनारायण आचार्य पार्टीको कार्यक्रममा सहभागी हुन कपिलवस्तुमा रहेकाले भोलिका लागि सारिएको नेपाली कांग्रेस लुम्बिनी प्रदेश संसदीय दलकी प्रमुख सचेतक जमुना ढकालले जानकारी दिनुभएको छ ।

लुम्बिनी प्रदेशमा एमाले र नेपाली कांग्रेसको गठबन्धनमा २०८१ साउनमा एमाले नेतृत्वमा सरकार गठन भएको थियो ।।