१२ किलो अफिमसहित दुई जना पक्राउ

सुर्खेत– कर्णाली प्रदेश प्रहरी कार्यालय सुर्खेतले लागू औषध अफिमसहित दुई जनालाई पक्राउ गरेको छ ।

प्रदेश प्रहरीले शुक्रबार पश्चिम रुकुमको आठबिसकोट नगरपालिका–९, राडीबजारबाट जाजरकोट नलगाड नगरपालिका–८, का ४६ वर्षीय मालबहादुर सिंह र सोही नगरपालिका–९, का ६० वर्षीय कालिबहादुर सिंहलाई १२ किलो अफिमसहित पक्राउ गरेको हो ।

आठविसकोट राडीबजारका धीरेन्द्र शाहको घरमा बसिरहेको गोप्य सूचनाको आधारमा लागू औषध अफिमसहित दुवै जनालाई नियन्त्रणमा लिएर थप अनुसन्धान भइरहेको कर्णाली प्रदेश प्रहरी कार्यालयका सहप्रवक्ता (एसपी) माधवप्रसाद श्रेष्ठले जानकारी दिए ।

उनका अनुसार कर्णाली प्रदेश प्रहरी कार्यालय सुर्खेतबाट खटिएको विशेष टोली, लागू औषध ब्यूरो सुर्खेतको टोली, जिल्ला प्रहरी कार्यालय पश्चिम रुकुमबाट खटिएको टोली र इलाका प्रहरी कार्यालय आठबिसकोटबाट खटिएको टोलीको संयुक्त प्रयासबाट दुवै जनालाई नियन्त्रणमा लिइएको हो ।