फेरि केही दिन मनसुन सक्रिय रहने

काठमाडौं- देशभर सामान्य बदली रही केही स्थानमा अहिले पनि हल्का मध्यम वर्षा भईरहेको छ । आज प्रदेश १ र सुदुर पश्चिम प्रदेशका एक दुई स्थानमा मेघगर्जन/चट्याङ्ग सहित भारी वर्षाको समेत सम्भावना रहेको जल तथा मौसम पूर्वानुमान महाशखाले जनाएको छ ।

यसैबीच भोलीबाट पुनः मौसम सक्रिय हुने भएको छ । वर्षा गराउने मनसुन न्यूनचापीय रेखा नेपालको तराई भूभाग नजिक आउने भएकाले भोली साँझबाट मुलुकका धेरैजसो स्थानमा मौसम पुनः सक्रिय हुने भएको हो ।

यस वर्ष नेपालमा गतजेठ ३० गते रातिबाट मनसुन सक्रिय भएको थियो । भोलीदेखि अरब सागरबाट समेत पर्याप्त जल वाष्पयुक्त हावा भित्रिने सम्भावना रहेको र न्यूनचापीय रेखा नेपाल नजिक आउने भएकाले भारी वर्षाको सम्भावनासमेत रहेको जल तथा मौसम विज्ञान विभागले जनाएको छ ।

भोलीदेखि सक्रिय हुने मनसुन केही दिन रहने छ । भोलीबाट फेरी धेरैजसो स्थानमा हल्कादेखि मध्यम वर्षा र केही स्थानमा भारी वर्षाको सम्भावना छ ।-