सप्तरीमा दुई हुण्डी कारोवारी पक्राउ

सप्तरी‍- सप्तरीबाट दुई हुण्डी कारोबारीलाई पक्राउ गरिएको छ । जिल्लाको बोदेबरसाईन वडा नम्बर ५ बाट राजस्व अनुसन्धान विभागले उनीहरुलाई पक्राउ गरेको हो ।

बोदेबरसाईन बजारमा शिवम इन्टरप्राईजेज सञ्चालन गर्दै आएका रामबिलास साह र जल्पा भगवती खरीद बिक्री केन्द्र सञ्चालक मायानन्द झालाई पक्राउ गरेको हो ।

उनीहरुले बर्षौदेखि अवैध हुण्डी कारोबार गर्दै आएको सुराग पाएपछि राजस्व अनुसन्धान विभागको टोलीले विशेष सूचनाको अधारमा साहको साथबाट ४३ लाख ८९ हजार ५ सय र झाको साथबाट ९ लाख रुपैयाँसहित उनिहरुलाई पक्राउ गरिएको राजस्व अनुसन्धान विभागका प्रहरी निरिक्षक नवराज न्यौपानेले जानकारी दिनुभयो ।

पक्राउ परेका हुण्डी कारोवारीहरुलाई ईलाका प्रहरी कार्यालय बोदेबरसाईनमा राखिएको छ । प्रहरी निरिक्षक न्यौपानेका अनुसार पक्राउ परेका साह र झालाई अनुसन्धानका लागि राजस्व अनुसन्धान विभाग पठाउने तयारी गरेको उहाँले जनाकारी दिनुभयो ।-