सप्तरीमा ट्रकको ठक्करले बालकको मृत्यु, स्थानीयद्वारा राजमार्ग अबरुद्ध

सप्तरी- सप्तरीको रूपनीमा ट्रकको ठक्करले एक बालकको मृत्यु भएको छ । रुपनी गाउँपालिका वडा नम्वर १ स्थित पूर्व पश्चिम् राजमार्गमा मंगलबार पूर्वबाट पश्चिमतर्फ जाँदै गरेको को १ क १०८४ नम्बरको ट्रकको ठक्करबाट स्थानीय आजिम जानको १२ वर्षीय छोरा रहमान मियाँको मृत्यु भएको हो ।

आधारभुत विद्यालय खोक्सर प्रवाहामा अध्ययनरत बालकलाई विद्यालय जाने क्रममा ट्रकले ठक्कर दिएको हो । ठक्करले गम्भीर घाईते बालकलाई उपचारका लागि बिपी कोईराला स्वास्थय विज्ञान प्रतिष्ठानमा धरानमा उपचारको क्रममा मृत्यु भएको जिल्ला प्रहरी कार्यालय सप्तरीले जानकारी दिनुभयो । मृतक बालक कक्षा ५ मा अध्ययनरत थिए ।

दुर्घटनापछि स्थानीयले पूर्व पश्चिम् राजमार्ग अन्तर्गत रुपनीमा सडक अबरुद्ध गरेका छन् । उनीहरूले मृतक परिवारलाई क्षतिपूर्ति दिनुपर्ने, राति १० बजेदेखि बिहान ५ बजेसम्म मात्रै ट्रक र टिपर चलाउन दिन पाउनुपर्ने सहितका माग राख्दै स्थानीयले सडक अबरुद्ध गरेका हुन् ।

ठक्कर दिने ट्रक र चालकलाई नियन्त्रणमा लिईसकिएको सप्तरी प्रहरीका प्रवक्ता नरेश कुमार सिंहले जानकारी दिनुभयो ।